ა(ა)იპ საქართველოს ეკოტურიზმის ასოციაციის გუნდის წევრები ვეხმაურებით რა ხელახლა ინიციირებულ კანონპროექტს „ უცხოური გავლენის გამჭვირვალობის შესახებ“, ვწუხვართ რომ კვლავინდებურად გვიწევს კანონპროექტთან მიმართებაში განცხადების გაკეთება. როგორც 2023 წლის მარტში წელსაც ვთვლით, რომ აღნიშნული კანონპროექტი მნიშვნელოვნად აზიანებს საქართველოს ევროინტეგრაციის კურსს.

აგრეთვე შეუძლებელია არ მივაქციოთ ყურადღება როგორც ჩვენი პარტნიორი ქვეყნების, აგრეთვე ჩვენი პარტნიორი ინსტიტუციების ცალსახად უარყოფით დამოკიდებულებას აღნიშნული კანონპროექტის მიმართ. ტერმინის ჩანაცვლება სხვა სიტყვათწყობის არ ცვლის კანონის არსსა და რეგულირების სფეროს და მისი მიღება გამოიწვევს როგორც ჩვენი ევროპელი პარტნიორების გეგმების ცვლილებას ჩვენი ქვეყნის მიმართ, აგრეთვე ჩვენს საქმიანობას შეუძლებელს გახდის, ვინაიდან უცხო ქვეყნის ინტერესის გამტარებლის დამღა ექნება, მაშინ როდესაც თითოეული პროექტი და აქტივობა დღიდან დაარსებისა ორგანიზაციას მხოლოდ საქართველოს ინტერესებიდან გამომდინარე იყო დაგეგმილი და განხორციელებული.

ჩვენი გუნდი ამჟამადაც აწარმოებს მოლაპარაკებას რამდენიმე საერთაშორისო დონორ ორგანიზაციასთან ახალი პროექტების დაწყების თაობაზე, რომლებიც მიმართულია საქართველოს სხვადასხვა რეგიონში ადგილობრივი მოსახლეობის ეკონომიკური მდგომარეობის გაუმჯობესების, გარემოს კონსერვაციის და მათი მდგრადი განვითარებისკენ. ყველა ამ პროექტის ბიუჯეტის უდიდესი ნაწილი გათვალისწინებულია სწორედ აღნიშნული აქტივობებისთვის და მინიმალურია ადმინისტრაციული ხარჯების წილი. სწორედ დონორი ორგანიზაციების დაფინანსებული ასეთი პროექტების საშუალებით საქართველოს ეკოტურიზმის ასოციაციამ შეძლო დახმარებოდა ისეთი ტიპის მცირე ბიზნესებს, როგორებიც არის: საოჯახო სასტუმროები, საოჯახო კვების ობიექტები, ღვინის მარნები, ტრადიციული რეწვის ოსტატები, სოფლის ტურიზმის ობიექტები, ადგილობრივი გიდები და სხვ.

აღნიშნული კანონის მიღების შემთხვევაში საფრთხე ექმნება არა მხოლოდ მსგავსი ტიპის პროექტებს და ყველა იმ ბენეფიციარის დახმარებას ვინც წლების განმავლობაში სარგებლობდა სხვადასხვა პროექტის დაფინანსებით, არამედ მთლიანად კითხვის ნიშნის ქვეშ დგება ჩვენი ორგანიზაციის საქმიანობა.

პ.ს. რაც შეეხება საქმიანობის გამჭვირვალობას აქვე გიზიარებთ ბმულს სადაც ნებისმიერ დაინტერესებულ ადამიანს უმარტივესად შეუძლია იხილოს ჩვენი მიერ განხორციელებული ყველა პროექტი, შესაბამისი დონორი ორგანიზაციის მითითებით და პროექტის ბიუჯეტით: განხორციელებული პროექტები

პატივისცემით,
ააიპ საქართველოს ეკოტურიზმის ასოციაციის გუნდი